رسالة الي دفعة 2020 طلبة اولي كلية
الرسالة دي من الدفعات اللي في الكليات ملخص اللي اتعلموه في السنين اللي فاتت.
- مش هي دي الكلية اللي هتقضي فيها اسعد ايام حياتك ولا هتعيش جو كريم عبد العزيز في "الباشا تلميذ" ولا دور "طارق كابو" ولا هتبقي ايامك كلها لايلو لايلو لايلو لالالاااااه .
- مش هتلاقي "تامر حسني" قاعد علي سلم الكلية بالجيتار الجميل بتاعه ولامِم البنات حوليه.
- مش هتبقي "الخديو اسماعيل" في (سرايا عابدين) والبنات هيترموا عليك.
- الكلية اول يوم بتبقي عامله زي "سوق عكاظ" تلاقي كل واحد داخل الكلية ولابس الحتة اللي علي الحبل ونازل يدور علي الجواري😂.
- بالنسبة للبنات برده حوار انك تمشي في الكلية وانتي حاضنه الكشكول ده انتهي من ايام المرحومه "فاتن حمامه"
- بالنسبة للشباب موضوع انك تمشي في الكلية وتخبط في بنت من غير قصد والكتب تقع وتنزلو تلموها في نفس اللحظة وتبصو في عيون بعض وتقعوا في حب بعض .. فالكلام دا انتهي من ايام جدي الله يرحمه 😂.
- معتش فيه الجو بتاع افلام زمان اللي هو البنت تيجي تقولك ممكن انقل المحاضرات منك يا بشمهندس او يدكتور وبعدين تقعوا في الحب وتتجوزا 😂.. للاسف الشغل دا انتهي من ساعة ما الدكاتره بقوا بينزلوا Slide علي جروب الدفعه لحد ما الواحد حاله اتوقف😂.
- هتروح الجامعة هتنقص حسنات ودرجات وفلوس كتير هتروح😂 وحط 100 خط تحت حسنات دي.
- ابعد عن "إنجي" البرنسيسه بتاعت الجامعة ودي بتبقي داخلة بتدور علي زيزو.. عاوزه ارتبط 😂 او فين الحفلات ويلا نخربها 😂 "فينك يا بسيوني😂" ويلا بينا علي الساحل.
- متحلمش انك تبقي قاعد في "food court" وتقوم انت وصحابك تتخانقوا زتضربوا بعض بالكراسي زي فيلم مرجان كدا 😂 عشان مفيش الكلام دا اصلا.
- طول ما انت في الكلية هتسمع صوت حد بيصرخ وتفتكر ان في حد بيموت او حادثه مثلا..😂 مش تتفاجئ عشان دا لولو قابل سوسو وبيعبروا عن مشاعرهم لبعض مش اكتر.
- هتلاقي البنات بيسلموا علي بعض بطريقة "اوه بيبي وحشتيني موت" او "انت احلويتي اوي" وممكن 5 مواه 5 ايوه بقي ويلا بقي 😂 .. يعني هتلاقي بوس وتلزيق وهم اصلاً مش طايقين بعض بس بيشتغلونا كلنا😂.
- معظم ال"Student Activities" بيبقي ملهاش لازمه خالص وبتخليك تضيع وقت كتير وبتخليك تسيب محاضراتك.. دا غير انها بيبقي فيها شغل تلزيق واختلاط في الخلاط والدنيا بتبقي فل 😂 وصور جماعية ويكتبوا فوقها "الحب كله" او ممكن "My Second family" شغل محن من الاخر 😂.
- لما تدخل علي جروب الدفعة احذر انك تعمل Add لأي واحده من اللي فيه عشان شغل الاسكرينات دا بقي شغال كتير وهتتفهم غلط ويتعمل عليك حفله 😂 وانت لسه في بداية حياتك يا ابني 😂 اتقل ونقي البنات اللي تعرفهم انت لسه قدامك 4 او 5 سنين مش اي واحده شكلها حلو وخلاص.
- بلاش الجو الهابط بتاع " كل لما تصور لبنت ورق اكتر هتحبك اكتر😂" فكك من الكلام دا ووفر فلوسك "summer course"
- اول اسبوع دا هتكره فيه نفسك مش عارف حد من اللي حوليك ومستغرب الناس وغالبا ممكن تحس انك انضف منهم وتتكبر وتستعفن تتكلم مع الناس ولو اتكلمت هتبقي تنك في نفسك كدا 😂 وتمشي زي رفاعي الدسوقي 😂.
- التاريخ ممكن يغفرلك اي حاجه الا انك تدخل اول يوم الكلية معلق البالطو الابيض علي دراعك 😂 او تدخل شايل مسطرة حرف T.
- الراجل اللي لابس بدله وبيشرحلك ده اسمه دكتور 😂 فكك من جو المستر والاستاذ او يا أبله عشان ممكن مستقبلك يضيع يا ابني من اوله 😂.
- وطبعا فكك من جو التريقه علي المدرسين بتاع اعدادي وثانوي 😂 الدكتور دا عامل زي اكل الحاجه في البيت😂 واظن مينفعش تتريق علي اكلها والا هيطلع عين امك 😂.
- اتأكد ان لو معاك بنات في الدفعة ووضعوك امام الدكتور فهتبقي انت في كفة وبنات الدفعة في كفة وطبقا لقوانين نيوتن فكفة البنات هي اللي هتكسب 😂.
- اول محاضرة في الكلية مش زي اول حصه في ثانوية يعني الدكتور مش هيدخل يتعرف عليك او يقولك هات 5 كشاكيل او جلاد اصفر زي بتاع مس نجلاء دا😂.
- وغالبا هيقولك اجهز عشان الميدتيرم وانت تلطم بقي وهو يتبسط وانت كدا 😂.
- جروب الدفعة بيبقي فيه شله كدا اسمهم "العشرة المبشرين بالامتياز"😂 هو صحيح مبيبقاش حد طايقهم بس اوعي تخسرهم عشان هتحتاجهم ايام الامتحانات😂.
- مش معني انك نذاكر يبقي هتعدي وهتنجح ومش معني انك مش مذاكر يبقي هتشيل 😂 لا ممكن تلم المنهج فعلا في آخر السنة وتجيب تقدير حلو كمان بس لو كنت منتظم من الاول ومهتم وعندك معلومات عن اللي خدته حتي لو قليله بس مفيش حاجه اسمها هقرا الماده وأعدي.
- لو محلتش كويس في الكويزات مش مشكلة..😂ولو ضايع في الميدتيرم برضه مش مشكله 😂 اهم حاجه الفاينل يعني خليك زي الاهلي كدا 😂 يبقي مغلوب في الماتشات في الاول بس بياخد الدوري في الآخر.
- درجات الرافة بتبقي درجة او اتنين من الوزارة عشان زواحف الدفعه ينجحوا لكن مش ال60 درجة بتوع المادة بتبقي رأفة 😂دي لو كفالة يتيم يا أخي مش هيدوك الدرجات دي كلها 😂
- الشطارة مش انك تدخل الجامعة طب ما فيه ناس دخلت قبلك كتير واحسن منك كمان لكن الشطارة في اللي بيتخرج منها بتقدير حلو.
- متسالش اي حد من الدفعات القديمه عن تقديره لان ممكن يكون شايل 😂 وهتلاقيه بيحضر معاك (السؤال دا بيجننه يا طه)😂
- حذَّر من صاحبك المنوفي 😂..واوعي تنسي ان "المنوفي يمرض ولكنه لا يموت😂"
- متمشيش كتير ورا البنات عشان هتدخل في حوارات ملهاش لازمه وهتضيعك وممكن تلاقي اتنين اصحاب اتخانقوا بسبب واحده وفي الاخر الواحده دي مشيت مع حد تالت غيرهم عادي جدا 😂.
- بالنسبة للبنات بقي اهلك اللي كبروكي 18 سنة مش يستاهلوا منك انك تصغريهم في 4 او 5 سنين ..خدي معاكي تربيتك وثقتك في اهلك وسُمعتك وكارنيه الجامعه عشان مش هتدخلي من غيره 😂.
- حرمانك من الميك اب وانت في المدرسة مش معناه لما تدخلي كلية تبقي "full makeup" وتبقي زي عروسة المولد كدا 😂هيجي يوم وهتشيليه ويظهر عبدالغفور البرعي اللي جواكي 😂 فرفقا بنفسك ايتها الفتاة 😂.
- الولد اللي هيسألك علي طول عامله اي في المذاكرة دا مش بيحبك 😂دا بيطمن علي المحاضرات اللي هينقلها منك😂.
- بلاش تهزري مع زميلتك في جروب الدفعه وتنادوا بعض ب "كائن الدودو" او "كائن الباندا" او "كائن اليويو" والكائنات دي عشان ميجيش زميلك "كائن البطريق ويدخل في الموضوع... عشان ساعتها هطلعلكم "كائن البغل"اللي جوايا 😂
- اعرف المصطلحات دي عشان مش تبقي غبي ومش فاهمها 😂
- الحصة الطويله اسمها "محاضرة"
- الحصة الصغيرة اسمها "سكشن"
- الواجب اسمه "شيت"
- الكانتين اسمه "كافتيريا"
- الفسحة اسمها "بريك"
- إمتحان نص السنة اسمه "ميدتيرم"
- إمتخان آخر السنه اسمه "فاينال"
- الساقط اسمه "مدبلَّر"
إرسال تعليق