ابو عين حمرا

نصيحة دفعة 2019 الي الدفعة الجديدة 2020

طبعا في الفترة الاخيرة ظهرت نتيجة دفعة 2019 واللي عملت ضجة كبيرة بسبب المجاميع اللي في السماء والناس اللي غشت وجابت مجاميع وغيرهم اللي ربنا مش وفقه ومش جاب مجموع واعتقد الكل شاف ايه اللي حصل في البيوت منهم اللي كان مبسوط ومنهم اللي اتمني ينتحر وكل ده في الاخر بيكون توفيق من ربنا.

ايوه فعلا هو توفيق من ربنا يعني علاقتك بربنا هي اللي بتحدد مستواك في 3 يعني لو كانت علاقتك بربنا حلوة هتلاقي ان ربنا بيوفقك وتبقي متفوق في دراستك وممكن برده بالغش مش تستغرب ازاي واعرف الفرق يعني عندك اللي جاب مجموع في 3 بالغش ودخل كلية قمة مش زي اللي جاب مجموع بمجهوده ودخل برده كلية قمة ولو الاثنين كانوا في نفس الكلية بتلاقي الفرق كبير جدا وهو ان اللي دخل بمجهوده في تفوق وتمييز لكن اللي بالغش هتلاقيه مش فاهم حاجه ولا عارف يعدي من اي مادة.

دي كانت مقدمة خفيفة كدا

دي بعض الحاجات اللي لازم تمشي عليها

علاقتك بربنا مش تضيع الصلاة عشان المذاكرة او أي سبب آخر وخلي بينك وبين ربنا ركعة وتر قبل النوم.
تنظيم الوقت اهم حاجة لازم إنك تبقي منظم وقتك بين دروسك ومذاكرتك.
احذر إنك تبدأ سخن او بمعني اخر مش تعلي النار على الاخر عشان الغاز مش يخلص يعني مش تذاكر 24 ساعة في ال 24 ساعة ذاكر المطلوب بس .
مش تروح عند اكتر من مدرس في المادة عشان مش تبقي مشوش.
مش تروح عند المدرس المشهور او اللي عنده طلاب كتير.
لو قدرت تأخذ دروسك كلها خاص يبقي أفضل والمجموعة مش تزيد عن 10.
الصاحب ساحب يعني في الفترة دي مش تصاحب الشلة الفاسدة اللي انت مصاحبها صاحب الناس الدحيحة اللي بتذاكر وبتخاف على الوقت مش اللي بيضيعوه.
ذاكر اول بأول واوعي تفوت حاجة او تسيب حاجة تتراكم عليك ومش تأجل حاجه لثاني يوم عشان مش تدمر نفسك.
شوف المدرس اللي انت هتفهم منه مش اللي بينكم عشرة طويلة.
خليك ملتزم بدروسك ومواعيدك.
ابعد تمام عن السوشيال ميديا بكل تطبيقاتها عشان هتخطف منك وقت كبير.
معلش برده لو مرتبط اجل الموضوع ده رغم ان هو حرام بس صدقني مش ينفع خالص في3.
ابعد عن الذنوب اللي بتعملها ولو في ذنب مش عارف تبطله احذر ان لسانك يتوقف عن الاستغفار.
الاذكار برده سواء كانت اذكار الصباح او المساء او بعد الصلاة حافظ عليهم عشان هتوفر لك بركة كبيرة.
وانت ماشي في الطريق للدرس خلي في كل خطوة صلاة علي النبي وانت راجع من الدرس استغفر.
مش تقفل على نفسك وتقول انا في 3 مش هخرج او مش هزور حدا لا خلي ليك يوم راحة بس مش راحة من المذاكرة لا يوم في الأسبوع تقدر تلعب فيه كرة او تزور حد او تخرج بس طبعا بعد ما تتأكد إنك مخلص مذاكرة.
اليوتيوب ودا سيساعدك كتير اوي هتلاقي عليه شرح لمدرسين ممتازين وطريقتهم سهله وهتلاقي عليه ناس بتحفزك.
القرآن ودا قبل أي حاجه انت لازم تحدد وقت تقرأ فيه ولو صفحه من المصحف او حتى اسمعه.
مش تحط هدفك كلية لا حط مجموع يعني 99% وكدا ممكن تجيب 98% او 97% خلي طموحك لفوق كدا عشان توصله او على الأقل تكون قريب منه.
وأخطر حاجه لازم تأخذ بالك منها هي المذاكرة الجماعية ابعد عنها تماماً يعني يوم لما تفكر تذاكر مع حد شوف واحد دحيح وبيخاف على الوقت ومش تبقي مذاكرة جماعية في كل المواد خليها في المادة اللي انت محتاج مساعدة فيها بس.